港股連升3日，噚日仲大升298點，恒指又創出今年嘅日中（17349）同收市（17346）新高，星期一個市唔跌反升，冇借外圍股市大跌之勢做落去，反而一個拗腰，兜番上去，形勢已經好明顯，調整已完成，再升過。
大行普遍睇好後市，前日已收到料，話一間大銀行背景嘅大行就睇呢個月可以升上17800，噚日恒指破位而上，且有近300億嘅大成交支持，照度上去，短線量度升幅目標更可以去到18000。
港股走勢已出現突破，而美國同日本股市亦係處於關鍵時刻，一破位而上，升勢又會再起，仲會帶動全球股市開展大升浪。
港股急升，短期仍會以藍籌股做主導，噚日不計認股證嘅上升股雖然有近450隻，但下跌股仍有240多隻，而股價不變嘅亦超過300隻，相信要待市場相信股市大時代真的來臨時，上升層面才會擴散，現時嘅策略應該係「買定等升」。
早前買定等升嘅金威集團（910），已經急不及待，突圍而出，衝上0.43元高收，再升2.5仙，升幅6.1%。個多月前，推介金威，當時股價0.335元，現時已累積上升近3成，睇𠵱家個勢，高位整固完成後，下一個目標將係0.45元。
花旗看好料見6.1元
雖然內地一路對樓市進行宏調，但由於經濟高速發展下，人民對樓房嘅需求有增無已，宏調對地產業所造成的影響，未有預期般大，且有個別地區嘅樓價更持續上升。大行一直都看好內地地產業嘅前景，現時佢哋更估計宏調已接近尾聲，加息將會係最後一招，而地產股經大半年嘅調整後，好快會重拾升軌。
中國海外（688）係內地地產股龍頭，噚日已係連續第2日上升，收4.95元，升0.14元。中海股價已橫行個多月，4.96元係阻力，噚日成交已增到2400多萬股，短期破位而上機會甚大，下一個目標係4月中的高位6元水平。
中海現時有1200萬平方米土儲足夠未來5年發展之用。花旗證券看好其前景，預測06年（12月年結）及07年盈利為25.4億元及34.8億元，分別升116%及37%，維持「買入」評級，目標價6.10元，有23%上升空間。
郭兆誠