PSP上欠缺驚慄恐怖Game，《生化危機》、《零》未見影，另一驚嚇之王《SilentHill》搶先公布推出PSP版，名為《Origins》（起源）嘅新作，《Origins》並非呃錢移植作，而係全新創作嘅續篇，有新角色、新怪物、新謎題外，仲加入新嘅「路障」系統，利用眾多房間特色，慢慢隔絕怪物嘅進逼，聽落已經想像到有幾緊張刺激！
官方剛公開咗幾張《Origins》嘅設計圖，從相片中已見到幾款新怪物，其中輪椅再唔係自己郁嘅死物，而係有隻「爛笪笪」嘅怪物黐住嚟行，另外亦有手腳調亂晒嘅怪物等，單睇圖片已覺惡心，拎上手玩時肯定可以嚇餐飽！
故事方面，時空設計喺第一代之前，故名為《Origins》，講述身為主角嘅貨車司機誤闖SilentHill，引發連串怪異事件，以過往慣例，相信劇情又係跟之前幾代有關連，令人相當之期待，可惜官網話07年年尾先推出，又再畀佢嚇一跳！
記者：徐影龍
網址：www.konami.com/gs/gameinfo.php?id=194