東亞李國寶非常有禮，每次開完業績會，都會寄番封傳媒答謝信，話多謝大家捧場到會，每當接受完訪問，之後亦會來信致意，呢個習慣多年來都冇變。華華噚日又收到一封，今次同以往有少少唔同，就係寶哥哥用圖章，代替以往的毛筆字款簽名。
雖則出封信唔係乜大件事，但喺銀行界嚟講，極少賓卡會咁做。見微知著，寶哥哥能夠得到眾多外資銀行支持，次次選舉都無敵手，去到內地人脈亦一樣咁勁，係有原因嘅。
近期為咗爭新客，東亞出一招派錢，現兜兜成條紅衫魚，只要你喺佢度自動轉賬出糧就派畀你，推廣期到年底！
計華華話，呢100蚊，真係畀得抵，事關好多人會用個出糧戶口找卡數，找水電煤費，呢類客嘅忠誠度高過一般客好多，一旦開咗戶，要走都唔係易，將來銀行開埋禮拜六日，呢班客更加係中流砥柱。