剛剛派成績表嘅渣打，非常擅長搞形象，代表作梗要數佢哋嘅馬拉松。華華最近收到風，搞咗十年嘅渣打馬拉松，下年會侵埋小朋友玩，渣打方面已經落實咗個計劃，成人馬拉松喺出年3月4日舉行，小朋友版馬拉松就會早一個星期日，即係2月25日跑，細節會遲啲先公布。
渣打話，小朋友好難跑到全馬拉松，到時比賽應該會賽短途一啲，可能一至兩公里，而且會按年齡分組，大家實力唔會差咁遠，比賽緊張好多。咪以為呢個超短馬拉松真係畀小朋友玩吓就算，渣打話到時會好認真咁計時，絕對唔會馬虎了事。
運動賽事延至韓國
渣打喺香港贊助咗馬拉松咁多年，已經成為一項盛事，對公司形象好有幫助。唔知係咪覺得成功，所以佢哋打算喺舊年新開拓嘅韓國市場，用番贊助體育項目呢一招，不過呢勻就係跑步、單車、游水三合一嘅鐵人賽，賽事會喺8月27日舉行。
華華仲聽到，渣打全球各地嘅員工都有派隊員到濟州出戰，香港都有三個員工代表飛過去，佢哋會接力出賽，每人玩一個項目，香港CEO蘇利民，今日仲會聯同400個員工，喺觀塘嘅員工餐廳開歡送會，為佢哋打氣以壯行色。咁佢哋除咗搞形象，做生意亦一樣咁搏，今年本地嘅業績表現都好爭氣。
李華華