華華最早聽到蒙民偉個大名，唔係因為要煲飯，而係大學有座蒙民偉樓。後嚟知佢好低調，但對教育好有心。最近，佢招呼咗一班內地大學生，將信興電器服務中心同信興物流變成景點，安排畢業生團嚟參觀。
團友分別嚟自佢母校北京清華大學、台灣國立清華大學、上海交通大學、中山大學、華南理工及深圳大學等。蒙民偉仲親自勉勵呢班學生哥，分享企業營運心得之餘，亦大話當年，講吓自己創業故事。
蒙民偉早喺53年就創業，開咗信興行，攞埋日本松下電器嘅港澳區總代理，賣電飯煲成名。雖則有電器大王之稱，但蒙民偉當年喺清華讀嘅，其實係讀航空工程。班大學生話，今次交流學咗好多嘢，對香港企業了解更深入。