夏日轉會市場有時真係好似打風咁，都唔知佢最後會吹咗去邊。好似前阿仙奴後衞蘇甘保前日仲吹緊去曼城，點知最後去咗樸茨茅夫，仲簽約2年、周薪45,000鎊（約66萬港元）。
樸茨茅夫領隊哈利列納獲蘇甘保加盟，當堂笑到見牙唔見眼，仲話全靠自己話「樸軍係英超大球會」先游說到對方來投；吹水都要抹下嘴啊！你估喺英超打滾多年嘅蘇甘保係3歲細路哥？
其實，蘇甘保捨曼城取樸茨茅夫，主要係因為樸軍嘅助理領隊兼前阿仙奴後防名宿阿當斯，作為對方喺高貝利嘅接班人，阿當斯講一句，好過哈利列納講一萬句喇！前輩叫到，蘇甘保唔理幾大，即刻去樸茨茅夫報到。
仲想挖走占士廸斯甸
曼城今次畀樸茨茅夫截糊自然不是味兒，但係「老鬼領隊」哈利列納仲想繼續撬對方牆腳。曼城門將占士同後衞廸斯甸都好可能過檔樸茨茅夫，前者更加兩日內有定案。曼城年輕領隊皮亞斯入世未深，今次咁樣畀哈利列納恰，惟有怪自己道行未夠喇！
上季樸茨茅夫以尾4完成聯賽，僅僅以4分之差避過降班厄運，今季後防得蘇甘保加盟，若再挖得占士、廸斯甸的話，呢支上季失球第2多嘅球隊（失62球），防守力大為加強，睇怕都唔駛護級喇掛！
「對中下游球隊來講，可唔可以買到1、2名好球員，好影響來季嘅護級命運。今次樸茨茅夫同曼城搶贏蘇甘保，仲可能挖走對方兩名後防主力，增加己隊實力，又可削弱護級對手，哈利列納認真毒辣！」