正式踏入八月，Game界終於旺場番啲，幾部主機都有重頭作，所以近日各大遊戲討論區再次熱鬧起嚟，由報價、貨量、疑問到攻略等，個個傾到不亦樂乎。當中最踴躍發言嘅討論串，肯定非XB360嘅《DEADRISING》莫屬，雖然貨運問題而延至今日先派貨，不過XBOXLive上已有試玩版供下載，所以幾乎有XB360嘅都先後下載試玩過。綜合眾多機迷嘅試玩報告，支持度接近百分百，個個你一言我一語，鬥數Game內血腥變態位同執到啲乜嘢做武器，有個網友仲話衝入唱片舖，執起大堆CD「片」喪屍，真係爽到爆！有網民唯一擔心係遊戲太過血腥暴力，要完全隔絕小朋友先可以開波玩。
今仗微軟可算吐氣揚眉，聲勢及遊戲口碑喺今個暑假蓋過其他主機，比《生死格鬥》、《RidgeRacer》仲巴閉，而且開放試玩版免費下載的確幾Work，始終好玩嘅會一傳十、十傳百，主機到遊戲銷量都會提升。期待嚟緊嘅《BlueDragon》！
記者：徐影龍
網址：www.capcom.co.jp/deadrising/