八方早前提過車淑梅（圖）有女今年會考，預計成績唔錯，噚日張文新就自己報喜，話囡囡Fioni不負佢同淑梅所望，取得5A4B嘅好成績，佢話「拔尖不成，可能係天意要個女入李寶椿聯合世界書院」。李寶椿咁威，啲學生來自世界各地，恨都恨唔到啦，將來升讀海外大學全無問題。
車淑梅話，個女噚朝返去九龍塘瑪利諾攞成績單，忽然忍唔住啲眼淚喊起嚟，原來係唔捨得由一年級起一齊讀書班同學仔。張文新就提個女做人要向前看，勝不驕，𠵱家只係起步。後來一家三口仲去咗尖沙嘴食火燄蝦慶祝，車淑梅話希望個女繼續努力，發光發熱，成日笑哈哈。
噚日對張文新嚟講，真係百感交集，個女考得好，但係位亦師亦友嘅頂頭上司吳錫輝就lastday，佢哋並肩作戰咗30年，𠵱家散檔，唔怪得感觸良多。