侍仔：噚日放榜，我表弟為搵學校搵到幾乎喊咁滯，真係戥佢可憐……當年自己都無佢咁頻撲。
招積域：咁你有無提供咩嘢方法畀佢呀？
菠蘿文：係囉，你唔會叫佢來做侍仔呀嘛？
侍仔：我噚日真係叫佢如果搵唔到學校，就同我一齊拍住上㗎！結果佢就好積極咁搵學校囉。
招積域：你表弟就係正常人，覺得做侍仔無前途，所以死都要搵間學校讀埋落去，唔好俾你睇死。
菠蘿文：侍仔，你以前讀書都唔差呀，做咩事為興趣去做侍仔呢，真係浪費晒。
侍仔：過去嘅嘢唔好提啦，𠵱家唔係最好，但亦都唔係太差啦。早幾日聽到話樸茨茅夫要買占士喎，哈利列納有病乎？
招積域：占……占……占士？！真係世界級門將呀！經常自製危險鏡頭，講蝦碌程度，有時連巴夫斯都要甘拜下風。
菠蘿文：但好搵唔搵，竟然搵個唔穩定嘅？
侍仔：老樸老闆係東歐人，點解唔搵東歐門將呢？有唔少人好過占士多多聲，同球員溝通又好啲。
東歐門將未必適應到
招積域：好門將都要適應期㗎，加上東歐兵人生路不熟，又唔熟習英超踢法，買即食亦都可以理解。
菠蘿文：如果轉到會的話，占士都會喺老樸退休啦。施文、馬田同占士，3個稍具水準嘅英格蘭門將都退役。
侍仔：好彩仲有羅拔格連同羅賓遜頂住！
招積域：都仲差一個先夠數喎。
林伯：卻克蘭都可以㗎！
高洛文