截監草案剛剛通過，劉江華一句「縱容大賊」令人心驚膽顫，恐懼隨時會被屈，假大賊，比任何巴士阿叔都要壓力大。網友是遭截監的高危對象，不過網友膽粗粗，博大霧繼續在blog議論紛紛，有人問：「以後用什麼通訊方法才能避開截監？不斷換手機網絡商得唔得？」有人答：「冇用。不如開始訓練信鴿。」
「網上聲稱有蘇製KGB時代的反截監儀器出售，信得過嗎？」語畢，網友即刻從「芒」上消失。顯而易見，俄國貨雖out，政府一樣唔放過。
「有朋友打算開班教摩斯密碼，連我女朋友都話唔學拉丁舞，要學梁朝偉。各位認為行得通嗎？」回應躍踴，很多都是這個:-）符號。得啖笑都好。
「不如抄《達文西密碼》條橋，以後大家交流都要極盡懸疑。」網友大呼頂癮，也有反建議，叫大家學紅毛猩猩，眉目和肢體傳情，盡量封嘴。或者嘗試在水底通話，能深潛的防水電話，應該有大好市場。貪靚網友說，就算部手機大隻過老土大水壺，他也願意用。
「有無人有政府的截監器，本人不惜高價接貨。」網友一開價，其他網友人同此心投標。有人想截老公偷食，有人截乖女跟邊個拍拖，有人截老細想升部門哪一位同事，有人截考試題目，有人截暗戀對象的裙底。截監器渴市程度比特敏福更甚，截監和反截監器傍身，乃潮人必備。特首寧濫勿縱，香港成功變身凸務之都。