昨日股市創今年新高，經紀黃推介的港機工程（044）更創歷史新高，勁升11.82％，收102.20元，為香港股市帶來另一隻紅底股。正如之前所料，大行對港機份成績表喜出望外，間間都調高佢嘅目標價。
除咗港機勁抽外，永隆銀行（096）亦因可能被建設銀行（939）收購，刺激股價勁升11.14％，收75.30元。
小初覺得好奇怪，因今次永隆被傳收購，居然冇好似先前佐丹奴（709）咁，需要停牌澄清消息。此外，永隆昨日股價升成咁，但連一個不明股價升因的例牌通告都冇，唔知係監管機構大細超，定係根本走漏眼。
前日，上海電氣（2727）因有董事喺內地受查而停牌，而姐妹公司上海集優（2345）一度急跌超過11%，最後跌幅收窄至3%，但昨日又再跌過，收2.52元，跌1.95％。雖然兩間公司同屬一個阿媽，但管理層唔同，況且大陸國營企業有個別董事出事，實在司空見慣，上海集優股價急跌，可以趁低吸納。
慕容小初