上個月有人致電各大報館，聲稱有歌手尋歡，矛頭直指杜德偉，佢噚日身在台灣接受東風電視台節目《桃色蛋白質》訪問，終於打破沉默，首次開腔回應傳言。
搞到身敗名裂
身穿芒果黃老西配鮮橙星形圖案花長褲嘅杜德偉，喺訪問中話自己唔可能召妓，亦唔會畀一半錢「辦事」，但就自爆艷史、承認確曾發生過一夜情，又試做過第三者，甚至同時間同7個女仔輪流約會，不過呢啲都係年輕時候嘅事，仲話自己𠵱家對感情嘅態度較成熟，不過轉個頭又話自己對感情有三不，就係不負責、不付錢同不亂玩喎，都幾自相矛盾。
至於點解突然打破沉默高調上電視台回應傳聞，杜德偉就話因為佢俾八卦新聞搞到身敗名裂，好多人一見到佢就覺得佢做壞事，所以至決定上節目，又話自己forgiveandforget（寬恕後忘記）㖭，即係話講完之後唔會再擺呢件事喺心入面。佢仲話好彩家陣傳媒熱炒「鋒芝戀」同王菲，所以佢呢單尋歡新聞對工作冇影響，今日仲會去天后宮拜神。
杜德偉喺台灣為負面新聞解畫，而舊愛周汶錡近日都為台灣微風廣場拍照，着上低胸裝製造迫爆衫效果。雖則與樂基兒同林熙蕾撞衫，但周汶錡仍然好養眼，難怪有報道話杜德偉對佢未忘情啦！
