打一句問一句，都唔信恒指可以一舉而升將近300點，恒指埋單17346。
恒指熊證又有新聞。6209打靶價（好聽啲叫做回收價）係恒指17200，恒指下晝一開就已經係17238，隻嘢玩完；到咗兩點4個字左右，6211又打靶，因為恒指升破17300隻嘢嘅打靶價。兩隻嘢屬R類，即係residue有得剩咁解，行使價高過打靶價，發行商會計番少少錢畀啲苦主。
上月28日，恒指熊證6205因為恒指升破13000打靶價，隻嘢第1隻打靶。
恒指熊證6214：恒指𠵱家距離17500，仲有154點，如果升破17500，又多1隻打靶貨，就係6214。6214年尾夠鐘，行使價17800，打靶價17500，亦都屬於R類。會否打靶，炒家由發行商畀番啲渣（行使價與打靶價相差嘅剩餘價值），好快有結果，但昨日由17.3仙碌到10.2仙，唔見41%，同發行價30.5仙比較，縮咗67%，都已經輸到揸家叫救命。表面上，隻輪溢價0.3%，槓桿率34倍，數據唔差，但一諗到恒指如果見17500，就會「斃」，無謂博。
中銀C輪3641：個市升得咁急，買C輪唔易克服心理障礙，揀落後藍籌C輪比較化算。吼中銀C輪3641。隻輪11月初夠鐘，輪價9.6仙，負溢價0.5%，槓桿率16.7倍（有效14.4倍），引伸波幅14.4%。
章盛