眾人契媽李麗娟無官一身輕，頻頻出席社交同慈善活動，噚日八方喺九龍公園見到佢，佢話𠵱家做義工忙過做官，不過放暑假都去咗地中海12日，行程包括意大利、克羅地亞、法國同西班牙，最深刻嘅係見到克羅地亞人民好堅強，將七成房屋屋頂髹成橙色紀念戰火重生。
不過媽打話此行去聖堂最多，目的係幫佢媽媽念經，祈求佢身體健康。佢仲話雖然買咗好多嘢，不過多數都係買畀媽咪，有頸鏈同手錶等等，當然亦唔少得一眾契仔契女嗰份。
講番個活動，係為咗倒數2008年8月8日晚上8時揭幕嘅北京奧運，點知撞正噚日嘅熄燈行動。出席嘉賓有肥平、霍震霆、陳祖澤同李家祥，不過仲有兩年先奧運，所以大部份嚟「慶祝」嘅人，其實都係為咗睇明星。