英超聯開鑼日仲有10日就到，各隊組軍進展都已經接近完成階段，但阿士東維拉新領隊奧尼爾因為新上任冇耐，所以𠵱家先開始着手組軍，真係戥呢支老牌球會擔心。
奧尼爾接任維拉領隊時間有限，佢遲開始組軍亦無可厚非，但距離新球季開波得番10日，要短時間內重組球隊真係唔易，奧尼爾就今個星期先同每名球員逐一會晤，了解各人對球隊嘅寄望同意願，呢啲工作到新球季就嚟開始先至做，遲就一定係遲，因為只要有兩、三個球員表態有意離隊嘅話，隨時兵源唔夠。
首仗對兵工廠唔輸就奇
仲有，奧尼爾亦開始物色新球員為球隊補充新血，好似富咸嘅馬白蘭基，同埋好多球會都搵嘅加維臣都係羅致目標，但可唔可以趕得切開鑼前加盟，似乎就真係唔多樂觀，而且聯賽揭幕戰對手係實力強橫嘅阿仙奴，仲要作客「大場」阿聯酋球場，想第一場用原班人馬情況下避免大敗，真係要睇奧尼爾嘅功力囉。
至於維拉高層賣盤到目前為止都仲係傾談當中，幾時收購成功唔係問題，反而賣盤會影響球員心理先最重要，所以奧尼爾逐個會見球員都希望全部留隊，如果唔係又買唔到新球員，舊將又走，奧尼爾真係曉飛都冇用啦。
「阿士東維拉上季已經跌到落中下游位置，今季雖然有新領隊奧尼爾領軍，但照睇現時組軍情況剛剛先開始，前景認真唔多樂觀，難怪奧尼爾逐個同球員會面，希望班舊將留隊應付聯賽啦！」