免費報紙周圍派，唔使搭地鐵先至有得攞，朝早六點零鐘，左丁山住所樓下，看更員嘅櫃枱上已有成百張免費報紙擺響度，任攞唔嬲。睇免費報紙可以好快，唔使十分鐘已經睇完。睇完攞去邊？梗係搵最就手嘅街邊垃圾桶。
免費報紙在歐洲最盛行，八月七日嘅《國際先驅論壇報》IHT講到歐洲各大傳統報紙，一為自衞、二為賺錢，紛紛計劃推出新嘅免費報紙。梅鐸控制嘅新聞集團手握英國兩大報紙──泰晤士報與太陽報，宣布會在九月份推出一份免費報紙。法國方面，兩大報紙陣營LeMonde與LeFigaro計劃推出免費報紙。德國一份財經日報Handelsblatt喺今個禮拜出版一份免費財經日報。
報紙出版商鬥出免費報紙，你估嫌錢腥咩。全世界計，每日派出嘅免費報紙估計有二千八百萬份，三分之二在歐洲派發，歐洲免費報紙嘅發行量在過去三年增加一倍，佔西班牙報紙發行量一半，佔瑞士、葡萄牙、丹麥報紙發行量嘅三成。
由於免費，發行費用高，只有一條進數，就係廣告，故此免費報紙嚴控成本，用於新聞（包括記者人工）嘅支出，只佔總成本嘅10%，差唔多全部走娛樂、輕鬆、八卦、體育路線，新聞短小，圖片掛帥。如免費報紙愈嚟多愈嘅話，記者愈難搵食，大學新聞系可以執笠──做免費報紙編採人員，識得睇收費電視，聽住電台，上網就得啦，讀新聞系都多餘。
德國科隆市嘅暢銷小報Bild，每日銷路有四百萬份，一於硬碰硬，二○○一年德國有免費報紙出現，Bild立即出番一份，砌到盡，逼到對方執笠之後，然後自己亦停止出版免費報紙。報紙老闆AxelSpringer話：「好嘅新聞應該係收錢嘅，goodjournalismshouldbepaidfor!」話雖如此，如果斯德哥爾摩嘅Metro帶動嘅免費報紙贏到呢場新聞大戰，劣幣驅逐良幣，goodjournalism會成為歷史名詞。