政府內部𠵱家已經唔講邊個做特首，因為係人都知。大家關心嘅係邊個做政務司長同埋邊個有職升。自從煲呔爵士黃袍加身以來，雖然時間只短短一年多，好多重要職位例如18區政務專員已經換晒人。公營機構、三不像機構以致諮詢組織亦陸續有人去接班。咁話到明親疏有別，當然要放自己人去關鍵位置，好為連任打好啲樁腳。
噚日官場又有調動，周達明升任康文署長。八方聽聞周係當紮之人，本來一早應該升，但係上一次煲呔提拔悍將，咁啱拔咗阿周太，即係非常打得嘅行政署長謝曼怡。為免一齊升晒佢兩夫婦，咁當時先升咗邱騰華做新聞處長，周達明繼續在D4嘅位坐多一陣。
掟王倩儀對住冬姨
周達明47歲，有MBA學位，84年加入政府做AO，做過社署、金融科、財政司辦公室，04年中起做環境食物局副局長（𠵱家叫副秘書長）。佢喺D4AO之中，排第27，資歷僅僅淺過排第26嘅謝曼怡，即係佢太太。民政搞地區工作，對煲呔好重要，所以越洋召回林鄭月娥睇實肥平，周達明入埋去，呢個局可謂猛將如雲。
原康文署長王倩儀就升任環運局秘書長，即係由D6升上一個D8位，以王倩儀資歷（佢79年入政府做EO，同年轉AO，03年開始做康文署長，在D6級官員同排名11，僅次於蔡瑩璧），升做秘書長都好合理。不過，佢係唔係煲呔嫡系就好難講。冇所謂啦，反正冬冬姨同煲呔都冇乜兩句，咪等佢哋兩個女將一齊玩。
對於普羅市民，明日之星周達明可能陌生啲，王倩儀就應該比較熟識。大家仲記唔記得去年泳池有紅蟲佢出嚟主持大局，搞到班救生員去報警呢（救生員罷工亦關佢事）。王倩儀除咗做常秘，亦兼任環保署署長。
講開官員調動，就快退休嘅副廣播處處長吳錫輝，今日班同事會同佢開歡送會。不過空降入去嘅AO傅小慧個任命，就尚未公布。