祖籍寧波嘅周星馳日前帶埋約20名班底，返咗家鄉籌備電影《長江7號》。呢齣戲講述父子情，佢話會扮演地球人，力捧新女張雨綺就未確定扮地球人定係機械人。
前日下晝兩點幾，星爺去咗寧波萬里國際小學，一心嚟搵校長簽約借場拍戲，唔知係咪因為放暑假，校長唔喺度，但因為呢個月18號學校就開學，所以一定要開學前傾好。其實星爺4月時都嚟過呢間學校揀蟀，因為佢打算搵30個小學生演出，其中一個肥仔仲會係主角㖭，嗰日面試時佢仲對一個肥仔好有興趣，不過前日星爺話要等小朋友開學後，再嚟一次面試至決定人選。
《功夫》班底
前日天氣酷熱，星爺都抵受唔住，索性除埋T恤，着住短褲瞓喺草地曬太陽，劇組人員就圍住佢身邊傾新片嘅嘢，之後星爺就去咗參觀花園同體育館，逗留咗半個鐘先走。佢話戲名其實仲未定好，但就好鍾意《長江7號》呢個名，又話會沿用《功夫》嘅班底，元秋、陳國坤同田啟文都會陸續飛嚟開工。