中秋節就快到,買邊款月餅好?呢個問題我問咗自己N年,自從幾年前改喫冰皮月餅後,我一直未轉過口味,今年又點?未諗掂,惟有上網睇睇網友意見。上「香港討論區」,有人問最鍾意食邊款月餅,結果係傳統蓮蓉月餅最多人撐,其次數到冰皮,再其次係雪糕同燕窩,反而甚麼貴價鮑魚、瑤柱就無人吼,網友pinco1668話:「傳統蓮蓉月餅……」另一網友50004001又咁話:「都你(係)傳統嘅好……」呢個係個好啓示──貴唔一定好、創新唔一定受歡迎。無錯,嘗試食材新配搭,係食界不應缺少嘅專業精神,但一定要懂得點樣配搭、用乜配搭,胡亂創作絕對唔係Fusion。仲記唔記得甚麼豬手、咖喱雪糕?純粹譁眾取寵,聽到就驚!呢十年八年,市面一味推出甚麼鮑魚、金箔、瑤柱……月餅,一味賣矜貴,食月餅代表甜美團圓嘅象徵意義無晒,講真,要食鮑魚、瑤柱,又何必靠一個月餅?
網址: http://www7.discuss.com.hk/viewthread.php?tid=2022128&extra=page%3D1