港大今日開始成為《經濟日報》嘅「股東」！唔係港大主動入股，而係《經濟日報》大老闆馮紹波夫婦將市值約8,900萬元嘅一成股份捐畀母校，成立「杜鵑（1972）基金」。呢批股份規定15年內唔會賣，每年估計可收股息300萬左右，用嚟支持港大個百年大計。校長徐立之當然話好感謝啦，認為有助港大建立捐獻文化。
馮老闆伉儷係1972年嘅港大校友，同班一齊讀經濟學，記者問到佢哋相戀經過，二人都略帶靦腆咁唔肯講。至於點解個基金叫「杜鵑」呢就好樂意解釋，原來當年每到考試，校園內就會開滿杜鵑花，因此仲俾學生改名叫「騰雞花」。
馮老闆除咗見記者，亦通知公司同事，話1998年接受訪問時已經講過呢個心願。佢話港大栽培佢夫婦同個仔，非常感激，而捐股之後，自己喺公司崗位唔會變，大家唔使擔心。