侍仔：呢幾日橫風橫雨，光臨茶餐廳嘅人都少咗好多。好彩有你哋班無業遊民喺度坐吓，陪我吹吓水先無咁悶。
招積域：我都係放假無嘢做先陪吓你啫，唔好話我無嘢做喎。
菠蘿文：有冇睇報紙呀？阿士東維拉個新領隊奧尼爾，話想喺拜仁同皇馬簽夏格維斯同加維臣喎。
侍仔：竟然有咁嘅事？終於可以喺英超睇到夏格維斯啦！
招積域：乜你鍾意睇佢嘅咩？
夏格維斯勝在夠實際
侍仔：我覺得佢喺英格蘭國家隊入面，球技最好嘅一個。雖然無乜星味，但勝在夠實際。
菠蘿文：只係佢一直都無俾人重視過啫，英格蘭唔夠人，咪選佢入去囉，你話我講嘅。
侍仔：喺英超聯呢個咁嘅球圈，點兵跟住曼聯、利記、車仔嘅人選咪得囉。全部都係明星球員，選完之後又吹到幾勁幾叻。
英軍欠整體唔關球員事
招積域：你細聲啲講呀，你間舖好多英格蘭球迷㗎！
侍仔：驚咩呀我！英格蘭係屎波呀！係咪唔俾講事實先？
林伯：喂！死𡃁仔，你唔好咁口不擇言好喎。英格蘭好失禮你咩？當年諾定咸森林稱霸歐洲你喺邊度呀？𠵱家英格蘭屎波只係太重視球星，忽略咗團體嘅合作。
侍仔：世界盃前吹到林柏特幾勁幾威，後來咪又係一球無入過。
林伯：你呢個豆𡃁，都話英格蘭欠整體囉，關個別球員乜嘢事呢？幫我寫杯嘢飲，我就慢慢話過你知啦。
侍仔：好……
文︰高洛文