蜘蛛俠MattPearce7月中放出壁屋監獄，前日佢又有搞作，去禮賓府抗議煲呔曾蔭權整死佢條名為「Democracy」嘅紅色日本錦鯉，仲入稟小額錢債審裁處，要求煲呔賠償5萬蚊，9月13日早上9點審。
呢鋪真大鑊，據蜘蛛俠講，除非煲呔有特權可以凌駕法律，否則佢一定要出席聆詢，唔可以派律師代表，當然都唔係冇數講，就係煲呔道歉，兼且賠5萬大元。你話煲呔會唔會咁低聲下氣呢？
呢件「借錦鯉一去不還嘅死魚案」真係盡顯政府如何官僚。話說阿Matt7月19日攞條錦鯉送上門，話明借畀煲呔玩吓，仲有張post-card註明係借唔係送，咁位差阿哥就唔好收啦；之後第二日，阿Matt中午傳真去禮賓府要攞番條魚，冇人騷佢，佢當日下晝就入稟告煲呔，而煲呔私人秘書搞到7月28日先覆呢位出名嘅「搞事分子」，叫佢可以去漁護署攞番條錦鯉，可惜條魚瓜咗，得番條雪到冰硬嘅魚屍。
打官司，煲呔話要尋求律政司法律意見，阿Matt話今次係佢同煲呔之間嘅私人糾紛，唔應該驚動黃仁龍。
阿Matt97年回歸前一個月嚟香港讀書，同個比佢年紀大嘅老師結婚生咗個女，幾年後離婚收場，個女歸太太。佢同人合份喺灣仔租咗間好細嘅屋住，月租六千蚊，𠵱家佢靠同人補習英文為生，目前有20個學生，每月大概有7千元收入，啱啱夠生活。今次保釋出監，係前妻出兩萬蚊幫佢，佢當然好感激。問佢會唔會返老家Bristol，佢話唔會，因為佢覺得香港好啱佢住。