呢排天氣熱陽光猛烈，最啱時候食黃油蟹。食家口刁，所以一隻蟹兩隻箝八隻腳，有拆肉冰封火燒活埋灌酒亁蒸N咁多種死法，不過七大酷刑之中，始終以花雕蒸最原汁原味，始終係喫蟹，留條全屍慢慢剝殼，自己動手拆蟹先食得過癮。
記者：廖秀娟
攝影：楊錦文、何家亮
蟹身滿油香
我膽固醇過高，每年搵命搏食一次大閘蟹，淨係食蟹膏，蟹粉又淡又削，掂都唔掂。黃油蟹就唔同嘞，蟹膏變成蟹油滲勻蟹身，蟹肉滲滿香滑蟹油，連蟹粉都好好味，實在忍唔到口，何況「鴻星」公關姐姐做過實驗，話黃油蟹蟹膏膽固醇含量比雞蛋黃仲要低。堅定流我唔理，反正一年一次，抵搏命！膽固醇？唔理嘞，原隻黃油蟹照食，連黃油蟹粉做嘅點心都唔放過。鬼叫你黃油蟹好味咩，好味就抵死，仲要死七次都唔夠，黃油蟹七大酷刑，以留個全屍嘅原隻花雕蒸最原汁原味，支解剝殼啖啖酒香超正，我話嘅！
灌酒！花雕蒸黃油蟹 每斤$550
同樣用酒，但酒香明顯比火燄做法更濃，嗜酒一族應該喜歡。食蟹身記得點花雕酒，蟹膏變得更有內涵，愈食愈滋味。（a）
活埋！鹽插黃油蟹 每斤$550
黃油蟹放入粗鹽堆生焗，講真味道其實同清蒸差唔多，不過入口多了份鹽香味，賣相別致，嗜鹹一族必Buy。（a）
火燒！火燄黃油蟹 每斤$550
蒸熟原隻黃油蟹，用粗鹽堆好，淋紹興酒點火，火燄四起賣相靚絕，酒香四溢。蟹膏滲入淡淡酒味，清蒸外最好食法。（a）
冰封！冰鎮黃油蟹 每斤$550
夏天，就嚟劑凍食黃油蟹，膏香無疑減咗啲，但一比潮州凍蟹，會食得出普通凍蟹無嘅嗰份膏香，加杯啤酒咪話唔過癮。（a）
拆肉！黃油蟹粉燴千張 $198
千張即薄片滑豆腐，上鋪金香黃油蟹粉，濃淡相配味道相宜。師傅刀功好，豆腐切得太厚味道就淡，太薄就易碎，勁。（b）
亁蒸！黃金蟹粉盞 每隻$25
每次Order兩隻起，叉燒包皮做盞，內放黃油蟹粉蒸熟，膏香滲進包中，兩者皆美味，加上那隻炸得金黃嘅迷你蟹仔，賣相超精緻。（b）
爆漿！黃油蟹粉蝦丸 每隻$25
小心，細啖細啖咬好嘞，否則爆漿會辣嘴！炸香杏仁片包住彈牙蝦丸同蟹枌，超香口惹味，我十個推介。（b）
教你揀蟹
第一招：㩒蟹身
蟹身有任何傷口蟹油就會漏走，所以一定要手腳齊全蟹殼無缺。蟹膏飽滿者，㩒蟹身自然有脹卜卜嘅感覺。
第二招：揭肚掩
如果檔主唔介意，又或者你夠手快，揭開肚掩睇就最實際；掩內近屁股位見有油滲出，必屬佳品。
第三招：用燈照
黃油蟹級數有別，蟹膏唔夠多、蟹膏未完全變油、有硬膏留喺蟹身都未算頂級，連腳尖都滲油先係最正黃油蟹。肉眼見關節呈橙黃色，再用燈照，蟹腳亦現橙黃色，就係頂級黃油蟹。
食客有Say
搵食攻略
a.威龍海鮮酒家（23401003）
地址：鯉魚門海傍道中17號
交通：觀塘地鐵站轉乘鯉魚門專線小巴，或油塘地鐵站轉乘的士，不跳錶
營業時間：11:30am-11:30pm
座位：150個
最好賣：椒鹽瀨尿蝦、上湯大龍蝦
註：黃油蟹每斤$550，蟹價有可能浮動
b.鴻星海鮮酒家（26280886）
地址：銅鑼灣時代廣場10樓
交通：地鐵銅鑼灣站時代廣場出口
營業時間：星期一至六10:30am-12:00mn，星期日及假期10:00am-12:00mn
座位：500個
有着數：12:45pm前埋單離座、2:15pm-4:30pm時段，所有大、中、小點作小點計算
最好賣：石頭魚兩味、蟹粉小籠包