今日放榜，是應屆會考生的大日子，考得好就當然高興啦，考得唔好，喊完就要開始積極搵學校喇！四圍頻頻撲撲，真係少啲腳骨力都唔得！「自信」考得唔多好嘅Choco，就一早預咗今日要周圍騰搵學校，佢仲教埋大家煮補腳力餐，同各位會考生一齊加油！
記者：葉雪芯
攝影：陳偉強、陳盛臣
示範：Choco
脆炸牛骨髓 金黃香脆
價錢：$25
需時：20分鐘
材料：牛骨髓10條、炸粉1碗、雞蛋1隻、油6湯匙、椒鹽/生粉各少許
貼士：炸粉要拍得均勻，可用半煎炸形式，不會太油膩。
蠔汁扣鳳爪 軟腍汁香
價錢：$20
需時：20分鐘
材料：鳳爪10隻
芡汁：水2湯匙、蠔油4湯匙、生抽1湯匙、油/糖/生粉/鹽各少許
貼士：炒熟鳳爪時不要用鑊鏟大力炒，這樣鳳爪皮會爛。嗜辣的朋友可在蠔汁中加入XO醬或辣椒醬。
蒜泥炒西芹紅蘿蔔 蒜香惹味
價錢：$15
需時：15分鐘
材料：西芹2條、紅蘿蔔半個、油1茶匙、蒜頭4粒、鹽少許
貼士：西芹和紅蘿蔔不要灼得太腍，可保持口感。
撲學校
瘦幾磅
Choco是應屆會考生：「其實我已經係一個重讀生，舊年已經撲過一次學校；未有學校收！稍聞邊度有學額剩，真係幾遠都飛身撲過去，玩足兩日，足足瘦咗幾磅！不停搵學校，兩隻腳就嚟斷咁滯，搞到隻腳麻痹晒！」Choco都自認今年考得麻麻，撲學校嘅機會率應該幾高！親戚朋友為了支持她，就特別教她煮番幾味補腳骨力嘅菜；例如牛骨髓，佢平時就好少食，但炸脆後好香口，而且含蛋白質和維生素，營養豐富，撲完學校之後一定要食，可以幫大家補充體力！唔講唔知，Choco話西芹是鈣質十分豐富的蔬菜，搵學校咁靠腳骨力，少啲鈣都唔得，一於要食多啲！
今晚必飲消暑冬瓜湯
「另外，喺度提醒今日要跑學校嘅同學，打完風天氣會特別悶熱，頻撲完成日，好易積住啲暑氣！今晚最好叫阿媽煲定個荷葉冬瓜湯畀大家消消暑氣，如果唔係谷到成面暗瘡，有學額要去Interview時就唔好睇啦！」