欣宜把海獅式瑜伽動作發揚光大，靚女們邊睇邊偷笑，睇佢身材健碩，但面頰瘦削，work喎，仲唔拿拿臨報名學瑜伽？計我話，家陣天時暑熱，游住水玩瑜伽就最涼爽過癮，而且仲可以孖住友人一齊收身美體，齊齊化身成海狗海豹，不讓肥臂肉厚嘅「海獅」專美！
記者：盧家蕙
攝影：伍慶泉
Model：Winnie&Kinki@Salvador
Instructor：康正水療瑜伽學院總教練FionaKwok（25258707）
（左）海狗式
雙腳一前一後屈曲放右邊，雙手跨過頭頂呈O形，身體向右彎下，盡量把右腳尖掂右手踭。
（右）海豹式
雙腳一前一後屈曲放左邊，左手緊拉左腳掌，身體向左彎下，右手向天伸直作彈指狀。
水療瑜伽動作示範
瑜伽早已被證明是有效的健身操，好處是地方細細都學得，瑜伽教練FionaKwok：「水嘅阻力令動作不期然用多咗力，自然更容易收身，雙人動作又冇咁悶呢！」就算玩到成身汗，浸入水就即時涼晒，點睇都好玩過普通瑜伽吖！
熱身最重要
導師Fiona說：「淺水區適合熱身動作及難度較高動作，太深水反而做唔到。」
輕鬆減肚腩
腩肉難減，situp亦唔係唯一辦法，以下2式瑜伽動作難度不算高，讓你輕輕鬆鬆地踢走一圈一圈「士啤呔」。
搖擺浮板
蹲下，雙腳屈曲，雙手握住直立嘅浮板，用腰力把身體向左右兩邊搖擺。
難度：＊＊
船式（雙人）
跟同伴面對面坐下，把雙腳伸直並提起，兩人把腳掌緊貼一起，雙手盡量伸直，記緊腰板要保持挺直，維持10-15秒。
難度：＊＊＊
手撐撐收象腿
擊退大象腿、榕樹腳唔係一朝一夕，同朋友一齊做份外易上手，連model都忍唔住大呼過癮！
戰士式
一腳向外屈曲，另一腳橫向伸展，跟同伴手拉手，另一隻手伸出成直線，可收大腿及減手臂肉。此動作可做2-3次，每次維持10秒。
難度：＊＊＊1/2
幻椅式
二人面對面，腰板挺直，半蹲下，緊握對方雙手，可做3次，每次維持10秒。
難度：＊＊＊
貓踢腿
面向地，雙手按地以支撐身體，跟同伴相對並單手合掌。單腳屈曲半蹲，另一腳則慢慢踢高，維持1-2秒，每腳做10下，可考驗控制及平衡力。
難度：＊＊＊1/2
收手臂
要跟拜拜肉脫離關係，導師說難度愈高的動作成果愈佳，不過初學者就先試吓動作較易嘅竹樹式喇。
竹樹式
企直，雙手作合十狀，雙手盡量向上伸直，合十動作要一直維持。
難度：＊＊
望天收背肌
女人之家配上雄壯虎背，真係好礙眼，以下招式有助消減背肌上的厚脂。
雙人駱駝
雙腳跪下，跟友人雙手緊緊拉着，把身體向後彎曲，頭仰天，維持10-15秒。
難度：＊＊＊＊
提腳扭身收腰
以下2招教你點重拾longtimenosee嘅小蠻腰，忍住道氣、hold多幾秒自然瘦得更快！
側腰提腳式
橫躺於池中，雙手撐地，雙腳向右邊凌空並盡量伸直，維持10秒。再做另一邊。
難度：＊＊＊1/2
三角扭腰式
1. 右腳屈曲，左腳向後伸展，雙手向左右伸直。
2. 下身維持不變，右手平放地下，左手則緊貼耳朵伸直，身體盡量向右壓下。
3. 左手反屈向背後，右手則跨過大腿向後扣住左手並維持10秒。以同樣動作做另一邊。
