范太究竟08年仲選唔選？截至噚日，佢都話係五十五十，即係有機會選，又有機會唔選，真係唔知佢開邊瓣。范太自己就話選唔選其中一個考慮因素，係自己搵唔搵到好嘅選舉班底，事關上屆幫過佢助選嘅姑仔一早話唔do，咁又少咗一個好幫手。
點解個競選班底咁重要？原來係因為選舉實在涉及太多法律問題，一唔小心就會踩入地雷陣，范太話自己最驚選舉過程中有乜差池，要俾人請去廉政公署飲咖啡，影響自己一向良好聲譽，所以一定要搵個信得過嘅人睇檔，唔可以有乜閃失。
佢仲話，阿葉太選唔選都唔會影響到自己嘅決定，又話如果自己去馬，唔信一啲機會都無。咁鬼有信心，難怪連最奀皮嘅長毛都駕馭到。