MP3興起，iPod、手機甚至遊戲機都播到MP3，令行街聽歌文化進一步擴張，比咸豐年WALKMAN更流行。不過環顧街上，九成九人士都係配個普通Headphone就算，最多都係玩款玩型仔，間歇性見到「罩」晒耳仔嘅大耳筒，都幾搶途人目光。不過㗎仔仲叻，將耳筒加入仿水晶嘅碎玻璃，驟眼望好似水晶同鑽石咁閃令令，簡直係將普通耳筒變成首飾咁盞鬼！
呢款由日本公司ELECOM推出嘅首飾耳筒，名為EARDROPS，初推出暫定三個系列、24隻色，由心形、圓形到花形都有，Lady味道濃厚，若然一身雪白，再襯埋部白色iPod拎出街，肯定引嚟唔少人目光。EARDROPS預定八月中推出，售價約港幣$170至$250不等，有興趣人士不妨到其網上睇睇。
記者：徐影龍
