民建聯噚日正式派出姜淑敏角逐翠灣區議員，姜淑敏本身係工聯會港島東地區服務處助理主任，佢暫時對手只有一個，就係一位獨立人士、技術員古桂耀。
雖然只係區會補選，民建聯仍然好大陣仗，吹行雞晒齊馬，立法會議員蔡素玉同副主席譚惠珠都出動埋，呢啲只涉及幾幢大廈嘅小圈子選舉，人多一定會有好處。
譚惠珠好耐冇露面，玉姐就經常曝光，佢前排去過青海，之後又為截聽條例做煲呔馬前卒，舟車勞頓，佢不嬲都有啲聲沙，近日把聲就更唔掂。不過港島係佢選區，當然要幫姜淑敏上位，頂住啲民主派；因此聲沙都照為姜小姐吶喊助威，又同姜小姐攬到實一實。
民建聯對呢個喺9月10號舉行嘅補選志在必得，泛民真係要睇實啲，唔好俾人咁易𡁻咗個位。