煲呔曾爵士係咁意寫咗封親筆簽名呼籲信，就將親中愛國嘅保皇黨議員劉江華收得貼貼服服，甘心為佢喺議事堂上抹黑泛民主派對《截取通訊及監察條例》嘅修訂會破壞香港治安。好彩，有線電視將佢嘅發言直播，佢殺氣騰騰嗰句「就係要企喺度寸步不移，一條修訂都不能通過！」完全反映投贊成票嗰32個保皇黨嘅心聲，更加令全港市民睇清楚立法會淪落成點。
左霸王劉江華呢番言論，連好多本來較為保守嘅市民都頂唔順，雖然唔係所有媒體都有報道，但相對自由嘅網民紛紛表態，呢兩日喺網站留言版上呢條友就受到唔少網民譴責。八方噚日click去好多後生仔瀏覽嘅高登討論區睇睇，發現劉議員做咗討論區嘅紅人。較客氣嘅網民夜鬼話佢「面皮厚得不能以筆墨來形容」；唔畀面嘅網民gundamghost直頭話佢「持着阿爺啲鐵票喺度狐假虎威，可恥至極」；網友芝士條就形容劉江華係港人之恥！
討論唔出聲 電台扮局長
劉議員喺言論自由嘅網上世界都算係俾人鬧爆，喺留言版聲討佢嘅說話多到不能盡錄。有網民插佢話「立法會上嘅擦鞋仔愈嚟愈膚淺，要用到人身攻擊，阿爺真係冇家教」、「下屆話唔定撈番個局長做」、有人仲話「咁有格直頭可以選特首」。都好少見一個人有咁多人鬧。
不過連成個泛民營陣都敢抹黑嘅劉江華，又點會理網上民意？佢噚日依然性格不改，繼續死撐，話泛民議員一條修訂都唔可以過，否則就會破壞香港治安。呢幾日討論修訂案時唔見佢踴躍出聲，噚日喺電台度就扮晒保安局長，懶權威咁解釋條例內容。呢頭話執法人員唔會記咗你食碗雲吞麵嘅內容，嗰頭話法例對無辜者有賠償機制，睇佢咁投入，唔做局長跟班都真係嘥晒。
其實大家應該好多謝劉江華，唔係佢，唔會明一個人點解咁易變節。唔係佢，大家亦唔知立法會被保皇派操縱幾可悲。林行止在《信報》問「不留修訂片甲可有半點良知？」篇文令八方讀到擊節，但係同劉江華呢類人講良知，不如投一票畀長毛好過啦。