昨日晏晝兩點半開市，已知日股散345點；3點過後冇耐，英法德3地股市平均又唔見1%。咁嘅環境下，港股都可以由跌76點變為升65點，期指更由跌85點變為升107點。
期指收16957，表面高水4點。滙控（005）下周三除息1.17元，恒生（011）下個再下個禮拜一除息1.10元，總共拖低恒指48點，所以期指實際係高水52點。
昨晚美股如果冇乜事，恒指重越萬七，機會好大。
長實C輪9381：美國今晚議息之後，估計地產股有運仔行吓，搵啲地產股C輪短炒。
長實C輪穩陣少少做法，係買9381。隻輪明年2月初夠鐘，輪價1.03元，溢價4.3%，槓桿率8.2倍（有效6倍），引伸波幅25.5%。所謂穩陣少少，係指贏輸都細啲。想搏殺，揀9002，贏輸勁好多。
聯通C輪9846：聯通（762）有啲啲勢，收7.02元，升4仙，由中移動（941）帶住上。搵C輪短炒，執番啲消夜錢，向9846埋手。隻輪12月初夠鐘，輪價1.11元，溢價2%，槓桿率6.3倍（有效5.5倍），引伸波幅27.2%。
電盈C輪：6月下旬彈過隻電盈C輪4464，隻輪昨散29%，收5.7仙，6月高位70仙到𠵱家，跌剩8%。隻輪下月25日最後買賣，行使價5.5仙。睇住嚟，跌剩個8%到時再冇得剩。另外2隻電盈C輪4847與9156，下場都唔會好得去邊，其中4847用嚟墊煲底機會大過冇呔曾連任特首。
章盛