又有小型證券行爆煲，今次又係涉嫌老闆挪用客戶股票。經紀陳話，如果繼績咁搞法，細行經紀嘅飯碗真係隨時不保。
正如上兩次有細行爆煲一樣，並無三四線股受影響而下跌，反而公司自己唔生性就冇辦法，例如晶門科技（2878）業績差過預期，就算公司回購亦無法阻止股價下跌。
向來踏實的龍記（255）亦話發表盈利警告，隻股即時急跌20.93％，收3.40元。
龍記向來受芬佬歡迎，散戶持貨反而唔多，成交亦向來偏低，今次失驚無神發盈警，班芬佬就算想沽貨走人，睇怕都唔容易。
工業股冇得玩，大陸零售概念反而繼續有得玩，如果唔係，日本仔又點會斟佐丹奴（709），而近年致力發展大陸內銷市場的宜進利（304），即將喺上海新天地開新舖。
宜進利股價昨日升1.18％，收4.30元，重返52周高位，成交股數223萬股，金額957萬元。
慕容小初