早前卡森國際（496）因為上市8個月就發出盈利警告而被千夫所指，連保母瑞銀都被質疑何解保薦卡森這類公司上市。
不過，阿虎覺得卡森好過連盈警都唔發嘅先施錶行（444），先施錶行於去年10月上市，掛牌時間與卡森相若。上市之後，先施錶行一直未有發盈警，話業績會大跌，但噚日收市後所公布的首季業績卻異常駭人，只賺117萬元，盈利大跌94.38%，現時買入半新股真係要好小心，該股由上市初期最高1.26元，跌至昨日收市的0.69元，已經冇咗4成半，相信今日股價仲有得跌。
至於卡森，公司最近加大回購力度，1/8-2/8日共購入57萬股，8月3日回購增至170萬股，每股1.05元，8月4日回購154.9萬股，平均每股作價1.0465元，該股暫時於1.05元企定。
龍記發盈警急挫
龍記（255）發盈警，預料中期盈利大跌，噚日股價大跌21%至3.40元，但成交只得434萬元。此股一向貨源歸邊，如果有基金要錢唔要貨，後市可能跌得更勁。公司管理層6月曾向證券界表示，今年首季鋼價上升約10%，但未能將成本轉嫁予客戶。其實該股早前已遭拋售，由6元水平跌至4元水平。
晶門（2878）上周五有基金洗倉行，以致股價大跌25%。噚日有投資者入市博反彈，但始終反彈乏力，最低跌至1.55元，收報1.61元，再跌4.2%，成交達2187萬元。黑客話，今次晶門急跌，聽講其中一個原因是管理層未能交出對未來兩三季的業績指引，芬佬計唔到數，所以沽貨離場。
被日本便服王垂青的佐丹奴（709），復牌股價急升18%至4.80元，成交達2.08億元。而於上周炒高的堡獅龍（592）升至0.60元便行人止步，篤手指客見勢色唔對，匆匆沽貨離場，令堡獅龍倒跌5.2%至0.55元，接近打回原形。
阿虎