美聯物業宣傳咗成個月嘅「置業新居、驗樓話咁易」講座，早兩日已經舉行完畢，聽講原先預咗150個位，但因為事前宣傳工夫做得太足，包括寄晒信畀各區屋苑，結果超過400人報名，因為場地所限，大批入唔到場嘅人，仍堅持喺場外等候，好彩冇出現迫爆玻璃嘅情況。美記話會短期內加場，等之前聽唔到專家教路嘅人，可以補番飛咁話。
講開美記，佢哋話舉腳贊成今晚8點嘅「香港熄燈」活動，集團總部好肯定會今晚8點正熄燈，至於各區分行，就冇話實會唔會準時熄燈，始終做生意緊要，唔通有客都熄燈點蠟燭咩？其實，節約能源作為一種口號，係幾理想嘅，理論上仲可以減省公司開支，不過，商業社會競爭咁大，畀你揀，會行入間燈火通明嘅舖，定係間話支持環保熄晒燈嘅「黑店」？