人人對大陸呢塊肥豬肉虎視眈眈，其實印度都有啲油水。貿發局做咗個調查，講到印度市場幾咁好，貿發局首席經濟師梁海國仲推一把，話未來幾年印度應該會保持雙位增長，仲話印度係一個潛質極大嘅市場。不過，有心去投資嘅商家廠家，華華建議佢哋都係要諗過度過先。
點解咁講？印度係一個有10億人口兼發展中嘅窮國家，啲人出名數口精，啲嘢唔夠價廉物美嘅，唔買！保護主義非常強烈，超過400項貨品都受到反傾銷稅限制；加埋老翻唔比中國少，𠵱家得Esprit、佐丹奴同偉易達等大牌子打到入印度市場。賣衫仲淨係賣男裝先掂，因為一般印度婦女都淨係肯着傳統嘅Sari（紗麗）。
咁當地每年收入4400至21800美金嘅人有5600萬；中高收入階層到07年將有3820萬人；到2010年，零售市場規模會擴大30%至2030億美金，又真係唔可以當佢冇到。究竟呢塊係肥豬肉定係豬頭骨呢，就由大家判斷喇。