港股噚日嘅表現比預期為強，雖然美股上周五先升後倒跌，日股噚日又大跌，歐洲股市開出又造低，但港股唔單止冇繼續調整，反而「挫一挫」之後，臨尾仲可以砌番上高位，恒指收16953，升65點，期指仲大升107點，變番高水，但成交就唔夠200億元，大多數投資者仍存觀望，未敢貿然入市。
港股個勢本來係調整緊，日股大跌300幾點，港股借勢再插多一二百點，好正常，但恒指噚日最低都只係落到16811，跌76點，試過跌穿10日線（16887），但可以一個拗腰，兜番上去，真係唔簡單。仲有，若果周一美股繼續跌（市場人人都預咗），而周二港股仲係咁硬淨，咁對後市真係要重新估計，話唔定調整已完成，再升過。
大行普遍睇好後市，一間大銀行背景嘅大行就睇呢個月可以升上17800，藍籌股要留意中移動（941）同長和系，國企首選係建設銀行（939），中石油（857）同國壽（2628）亦要兼顧。
上月中推介聯康生物科技（690），當時股價2.70元，噚日借鄭裕彤入股嘅消息，一舉而抽上4.01元，1日之內，大升34%。鄭氏係透過周大福，以每股2.50元，認購聯康1.08億新股，總代價2.7億元，聯康將會運用呢筆錢，進軍藥業，繼續大搞。推介時已話到明，聯康嘅貨源絕大部份在強者手中（噚日升咁多，成交都只係500多萬股而已），成隻股票嘅「可塑性」極之強，話唔定日後股價仲可以翻幾番，上咗車者就一於上移止賺位，賺到盡。
講番建行。噚日同一個大芬嘅頭頭傾開，佢話未來一兩個月，會有好多錢堆落建行度，「染藍」係原因之一，二來炒中國概念，買銀行股，咁多隻之中，建行最抵，佢睇建行短線可見3.80元，中線好大機會升上4.20至4.50元。
短炒可吼C輪4556
近半年來，建行走勢形成大型複式頭肩底，頸線在3.66元，10日線已升越50日線，今日再穿20日線，新升浪將確認，頸線水平略作整固後，一破位而上，最小量度上升目標係4.12元。
短炒買建行輪，可留意4556，10月初到期，有個多月時間，夠晒，唔好話多，就以建行3.80元計，4556平水都見0.52元，升幅82%！
郭兆誠