港股近排走勢唔多正路，連續幾日都係應升反跌，應跌反升。昨日外圍市況其實頗差，日股大跌345點，但港股反覆上升65點，收16953。
趙飛雲始終略為看好後市，所以昨日仍按原定部署，見太A（019）回至10日線81.30元水平買貨博反彈，於81.35元買入5000股，而太A午市又有買盤入市掃貨，抽回82.55元收市，倒升0.35元。
太A昨先低後高，日線圖出現釘頭，利好今日再升，不過若股價升上83.40元至84.20元水平受阻，會考慮先計數食糊，未必會等埋周四公布中期業績。太A業績估計無太大驚喜，市場預期會受航空業務拖累，瑞銀早前出報告，亦因此輕微調低太A06及07年度盈利，但維持買入評級，目標睇95元。
另外，昨日聯康（690）市前叫價已去到3.30元，預示冇平貨買，趙飛雲計過數在3.35元買多兩萬股，倉內6萬股平均買入價2.53元，較彤叔入股價貴3仙，基本上已經買齊貨，中長線等收成。
近期《福布斯》雜誌有專文講中國醫藥業商機無限，有專家指出現時中國人均醫藥開支每年僅為10美元，而美國則為623美元，並預計到了2010年期間，中國將成為全球第5大藥品市場，市場每年營業額可達240億美元。買聯康亦主要是炒這個概念，昨股價愈升愈高，收4.01元，大升34%。
中國稀土可留意
睇圖揀股可留意中國稀土（769），近期股價大幅波動，但始終守住20周線1.54元水平，現時周線保歷加通道頂在1.97元，炒波幅亦有一定值博率，可小注在1.50-1.54元水平收集，跌穿10日線（現處1.42元）止蝕。
趙飛雲