啱啱喺上海打完嘅四角賽，東道主申花包尾之餘，杜威、吳偉超、楊純剛仲齊齊加入十字軍，最慘就係兩日比賽票房失收，申花今次諗住「響朵」搵大錢，點知「偷雞唔倒蝕渣米」，真慘！
申花最近都算禍不單行，對曼城同馬德里體育會兩場表演賽輸波兼食蛋，4隊排包尾之餘，最慘就係票房大失收，兩日加埋唔夠一萬觀眾。另外，申花3位球員勇戰受傷，其中新仔楊純剛傷勢最重，佢俾曼城後衞戴卓爾撞到飛出球場，送院檢查後證實肺部嚴重創傷，將來踢唔踢得番都係未知之數。曼城見事態嚴重，球會已經喺噚日發出慰問信道歉補鑊。
超仔傷勢無大礙
至於杜威同吳偉超，兩人都喺前日對馬體會時出事。國腳杜威初步診斷後發現韌帶撕裂，睇怕今個禮拜四都唔會隨申花嚟香港打Canon盃；至於超仔方面，相信好多香港球迷喺電視睇見佢被抬離場時，都好擔心佢嘅情況。我求大俠噚日打俾超仔問候，好彩佢話「拗柴」傷勢比預期輕，仲託我叫大家放心。
不過，聽超仔口風，由於杜威有一段時間養傷，超仔喺申花嘅上陣機會大增。不過，港隊最近徵召球員出戰亞洲盃外圍賽，申花會唔會俾超仔歸隊則屬未知之數。如果超仔最終唔能夠踢港隊，下周三作客烏茲別克場生死戰睇怕都凶多吉少。
「申花主辦四角賽搞到傷兵滿營兼搵唔到錢，最慘就連口碑都輸埋；兩連敗兼食蛋嘅申花，排名喺鹿角之後，難怪佢哋俾國內傳媒狠批為亞洲二流球隊。」