股市雖然企住喺萬七點水平，但係完全冇氣氛，美國話就話唔加息，但唔加個市都未必升，萬一加就分分鐘跌幾百點。中午食晏，班經紀竟然講去深圳玩都唔講有乜好炒，真係中環奇景，難怪成交二百億都唔夠。
繼大發證券之後，噚日又到永業出事，涉嫌撻咗客戶啲股票，情況同大發一樣咁嚴重。奇在個老細自己企出嚟認晒衰。有人就話，都唔知係咪博減刑，事關呢類涉及誠信嘅案件，如果告上庭，可以判得好重。
連埋胡經昌表哥以及葉劍波個妹嗰兩間，短短時間已經有四間經紀摺埋。究竟呢一行出咗乜嘢事呢？會唔會好似超級市場淘汰士多咁俾銀行淘汰晒呢？
詹議員唔喺香港，佢越洋發炮，話政府唔應該再打壓華資經紀生存空間，馬時亨睇嚟都要接招，咁多經紀行出事，雖然現時為止，證監都算處理得幾好，但啲煲係咁爆落去，噚日永業啲小戶已經操去搵立法會議員求助，你話有小股民上街遊行，煲呔唔詐型就假。