李澤楷出售電盈計劃又有暗湧，不過，今次唔係二少嗰邊有人想玩嘢，而喺對沖基金。
話說今年年頭，新橋投資有意向盈拓小股東提出私有化建議，用每股0.3坡幣全購小股東股票，將公司私有化。後來計劃都未去到法庭會議嗰度，就出現咗李澤楷賣電盈股份事件，最終仲俾番薯梁用92億同二少買咗盈拓手頭嗰23%電盈股權。聽講有好多對沖基金喺呢段時間入咗貨，以為有得執。
點知二少只應承喺自己荷包攞13.8億派畀電盈小股東，派得粒糖，梗唔高興。據講，有對沖基金喺二少公布買電盈後，不斷增持盈拓股份，務求向二少施壓，迫盈拓向小股東派特別股息。事關新橋同出售電盈股份都要盈拓開股東會通過，唔知二少會唔會咁順攤應承？