前排有關巴士阿叔嘅新聞好hit，靜咗一輪之後，噚日有多一單，主角係民建聯嘅前主席曾鈺成同八方，佢呢位巴士阿叔就只係唔睬人，並無鬧人。
話說八方噚日響港島東區搭106號隧巴去紅磡採訪民建聯「讓啟德再起飛」嘅東南九龍發展計劃。巴士去到炮台山成報大廈對面馬路個站，曾鈺成獨自上咗車，接住上埋上層坐喺中排大窗口位，八方於是坐埋去佢身邊，問吓佢點解唔揸車改搭巴士，係咪想更加體察民情？
曾校長冇特別回應，只係話知道呢個時間106巴士有位坐，希望趁去紅磡嘅車程休息一吓，揸車嘥精神。八方記得佢當年試過火燒車，燒咗架平治，好彩冇事。又係嘅，上個禮拜六截聽條例搞到班議員冇得瞓，星期日休息一日後，又馬不停蹄為民建聯撐場，所以係要休息吓，唔怪得八方同佢喺巴士15分鐘車程，佢成日擰側塊面，望出窗外，乜都當聽唔到。