上山頂，搭纜車好過癮呵？凌宵閣好宏偉呵？喺獅子亭睇風景好正呵？睇完風景影完相，問題嚟嘞，喺邊度開餐好呢？捱快餐無癮，食山頂餐廳無一千幾百又唔使旨意落山，點算？喫麵喇，凌宵閣有新舖專賣麵食，五六十蚊碗麵嫌貴？喂，山頂喎，比起其他高級餐廳，抵到笑喇。
記者：方綺君
攝影：何家亮
模特兒：Michelle
1.十全十美$30
飲品名總算言之有物，十全十美用橙、提子、蘋果、蘿蔔、青椒、雪梨、番茄、芹菜、黃瓜同紅莓10種水果蔬菜製成，消暑又夠健康。
麵食無國界
出街食飯有時都幾煩，我諗人人都試過徘徊街頭，久久都諗唔定坐低邊間餐廳落Order，尤其上山頂，食肆選擇係就係多呀，不過間間價錢都有番咁上下呢。腦交戰，一要顧住荷包，二要顧住身邊女朋友面色，家陣大熱天時，睇住佢熱到溶裝玩黑面，仲搵唔到地方坐低，點算點算？咪諗喇，去開業一星期嘅「EatingPlus」喇，老實，「EatingPlus」感覺同大型商場嘅Foodcourt差唔多，主打年輕人市場，本住麵食無國界概念，提供多國唔同麵食選擇，坐低，有齊馬來西亞喇沙、日本冷熱烏冬、意大利粉同越式金邊粉等等麵食任你點，天熱食麵有啖湯飲吓，胃口都好啲吖，歎完麵啪多杯配搭新穎嘅鮮果汁，仲唔透心涼？最緊要係價錢都算大眾化，唔使喺山頂捱貴餐。
8.豉汁蝦球炒麵$78
中式做法，大廚話︰「豆豉可以叫做中國香草，炒出嚟嘅食物特別香口。」豆豉算唔算中國香草？見仁見智喇，不過咁多款麵食當中，我最Buy呢個，豆豉芡汁炒蝦球，搞鬼！仲要配炒麵底，味道難得咁夾，虧師傅諗得出。
9.越式生牛肉金邊粉$56
正宗越南美食，最緊要係湯底整得夠入味，湯底用牛骨、香料等煮10小時以上，非常入味，唔會一味得個鹹字，美中不足係有少少油膩，食完要飲杯生果特飲潤吓喉。
10.冷咖喱牛肉烏冬$62
冷食終於出場！日本扁烏冬冷麵，估唔到咁滑，混入冷咖喱同椒絲菜沙律，入口涼浸浸啱晒夏天食。最驚喜係牛柳，紅彤彤半生熟，涼食都唔會咬到有渣。
11.素菜喇沙湯麵$52
同我一樣鍾意犯賤，熱到趴街先嚟食辣嘢？食喇沙啱晒數。記住喎，一定要飲埋湯底，湯底用10幾種香料煮成，好重椰奶香，落到胃都仲有少少辣。
12.扒鮮三文魚意式麵$70生機滑冰$30
意式麵用檸檬橄欖油炒過，條條有檸檬香。生機滑冰個名改得懶有嘢咁，成份有香蕉加藍莓加士多啤梨，顏色好靚。
搵食攻略
EatingPlus（28497855）
地址︰香港山頂道128號凌霄閣P1樓P102號舖
交通：山頂纜車直達凌宵閣
營業時間︰11:30am-10:00pm
座位︰52個
人均消費︰$60-$130