噚日玩MSN同班師奶網上發噏風，大家都異口同聲話乜都陰啲陰啲係咁加；猶記得以前晏晝老公仔女返晒工又返晒學，最鍾意十零蚊食個麥記當一餐，不過𠵱家唔經唔覺已經加到22、23蚊，真係抵得上茶記食個飯！
而同樣嘅事亦發生喺鹹水魚身上，最近啲海魚差唔多貴咗2成有多；以前最抵食嘅鱸魚，10蚊唔使就執到條，但最近2、3個月就長期維持$12-$14嘅高水位！
咁我就懶醒咁，問係唔係因為休漁期嘅關係，班靚師奶話我都儍嘅，休漁期一早完咗啦！其實原因係香港近海嘅魚，真係養唔大又唔夠產量，貴咗又細條咗，再俾「派比安」輕輕掃一掃，又死一批魚，唔貴就假。
須知要養大番晒香港近海嘅魚，真係唔係一頭半個月嘅事，相信鹹水魚價暫時都係無止境企喺高位；想執平貨？惟有食啲平價淡水魚頂住檔先啦！