Intel粒新Core2Duo處理器落場，對追求電腦表現用家，自然相當受歡迎，不過對手AMD同樣有反應，採用永遠都Work嘅撒手鐧；今個星期立即喺價位上作出反擊，減價徹底兼全面，由高檔Athlon64X2、主流Athlon64到入門級嘅Sempron亦都會冧價；Sempron2800+平到$400有交易，中檔Athlon64所受壓力無咁大，所以減幅算係較少，至於首當其衝嘅Athlon64X2可以話係大出血，部份型號減幅達一半，其中以3800+較為搶手，以新世代64bit處理器嚟講，的確幾抵玩。
記者、攝影：許福合
抵玩HDMI顯示卡
𠵱家AV友個個都話要HD高清，電腦又幾時進入HD年代？其實現時唔少人已經有高清電視機，只要電腦顯示卡配備HDMI插頭輸出，就能將高清畫面輸出至電視。
喺腦場中就見到天揚嗰張X1600Pro顯示卡，除咗電腦常用嘅DVI插頭，更附有HDMI輸出介面，可以玩HD之餘，對於遊戲畫面表現都係中上之選，價錢就賣$1,190，玩得過。
電子錢包抄歌抄相
電子錢包（DigitalWallet）一向都係數碼玩家至愛，貪佢抄相抄File夠方便，唔使下下帶Notebook咁論盡。不過好多電子錢包質素好但價錢超貴，一般人都以價錢行先，太貴就唔會考慮。最近場中見到一款電子錢包，賣價只係$200，而且仲係內置芒有畫面睇，不過留意係唔包硬碟，所以舖頭都好醒目咁提供埋套餐，連一隻40GB硬碟$690，都叫化算喇。
X1900GT新落場
唔知係咪臨近暑假，多咗人升級電腦打3DGame，腦場出現幾款規格強勁嘅顯示卡，而ATI今個星期又有新顯示卡落場，型號為RADEONX1900GT，雖然核心結構跟舊卡無大變動，仍然係使用R580核心處理器，不過從散熱裝置縮細可以估到，溫度比舊卡無咁高，而價錢亦係同系列中最平一款，連TV-Out及DVI插頭，配256MBGDDR3記憶體，賣$2,350，高檔顯示卡中算不俗之選。
