銀行開星期六繼續惹火，除咗唔想周六日返工班小職員呱呱嘈之外，啲賓卡亦好火滾。大家矛頭當然係始作俑嘅獅子行，事關9月真係周六開業，可能得佢有生意，其他存戶基礎比較窄嘅行，唔知有幾多個人幫襯，分分鐘連電費都嘥埋。
咁唔開又唔得噃，𠵱家競爭咁激烈，人開你唔開肯定流失啲客。於是有人就喺公會發難，趁住討論禮拜六收唔收支票，如果收，當邊一日入數計呢啲技術問題，點起火頭，結果上周五個會搞到六點幾。咁究竟邊個發難？梗係獅子行個最大對手，唔使華華講到明啦，唔通係恒生咩。
主席有着數
華華早前同賓卡食飯，佢哋已經媽媽聲，估唔到真係喺銀行公會開火。不過獅子行今年輪任公會主席，由王冬勝揸莊，上周五王冬勝啱啱有事，改由梁高美懿署理，點知就開大片，好彩梁太都係打得之人。記得任總講過，佢當年有乜大動作，例如引入LAF之類，都會揀渣打做公會主席嗰年至做（當時得兩間行輪住做，𠵱家多咗中銀）。咁獅子行今年搞嘢，又正正係佢哋自己做公會主席，其他同業都好難發圍。
李華華