近排甲級商廈買賣靜咗啲，主要係次級商廈多成交，唔少仲係嚟自投資者忍唔住手買吓賣吓。早前話睇好乙級商廈嘅資深投資者黎汝遠梗係出咗唔少力啦。
聽中原香港商業部助理營業董事李百堅報料，黎生揸住嘅銅鑼灣凱基商業大廈16樓全層，約1035方呎，啱啱以約339萬沽出，呎價3275蚊，7個月賺咗約41萬，升值近14%。
睇番黎生自己個網站，都有列出佢賣咗嘅一批乙級商廈，好似銅鑼灣京都廣場19樓A室、上環東協商業大廈24樓全層、北角城中心19樓05室、尖沙嘴嘅柏豪商業大廈7樓同卓能中心18樓04室。
李百堅又話，金鐘力寶中心2座1106室，面積約1104方呎，投資者以約839萬賣出，呎價約7600蚊，約3個月執11萬。
至於入貨嘅例子就有中環遠東發展大廈8樓04至05室，共約1941呎，有投資者連約以約718萬承接，呎價近3700蚊。單位現時回報約3厘，租約明年初至屆滿；若能成功以現時市場租金續租，回報就會升至超過7厘。
電郵地址：[email protected]
