終身學習，大勢所趨，修讀英語更為熱門。本報近日連續接獲多名讀者投訴，指報讀靈格風英語課程時遭誤導，停止上課後，又不斷被追收學費。消費者委員會提醒市民，參加分期付款課程前，需細看條款可否中途退出？中途退出又是否需要罰款？
個案一：任職游泳教練的姚小姐投訴說：「近兩年好多學生喺外國回流返嚟，我咪想讀好啲英文，應付教學生嘅需要。05年尾，我見靈格風成日出電視廣告，話有免費試讀，就打去問吓，個推銷員不斷游說我參加一年制課程，有導師教授，學費連教材17,000蚊，可以分期畀。」
推銷稱可配合時間
因需遷就工作，姚小姐事前已再三查詢上課時間。「我講明只喺朝早上堂，個推銷員就應承我，實配合到我嘅時間，咪與同事陳先生一齊報囉！」
陳先生說：「我哋畀咗首期，收咗啲課本同CD，預約上堂，就成日話冇位，或者畀埋晒啲下午嘅堂，撞正返工，同之前應承我哋嘅完全係兩回事。要花好多時間約，同隔幾個禮拜先上到一堂，依咁嘅進度，都好難一年內完成課程，達到申請持續進修基金嘅要求，於是我同姚小姐咪唔再上堂同畀錢，點知就有追數公司要我哋畀埋啲尾數！」
檔案編號：0727024
「唔讀都要畀尾數」
個案二：林小姐稱，於本年1月收到靈格風的推銷電話。「初頭以為佢淨係得自修課程，但個推銷員話佢哋係註冊學校，有導師，有正規堂上，叫我參加一年制課程，費用係萬七蚊，可以分18期畀。」
林小姐又說：「點知買咗啲教材，上咗兩堂就覺得唔對路，於是停止畀錢同上堂。之後就有收數公司追我數，話我已經簽咗合約，就算唔再讀都要畀晒啲尾數！」
檔案編號：0725052
個案三：周先生稱，他本來只打算參加免費試讀課程，「咁我喺網上登記後，靈格風就搵人打電話畀我，話有個課程仲好，可以分期畀錢，讀完又有政府資助，於是我就畀咗900幾蚊，同簽收咗8隻CD，4本書。之後我都未上過堂，諗住取消，點知對方話我簽咗約，其實我只係簽收咗啲教材，咁就話係合約。」
檔案編號：0719049
