拎住隻高達食過世嘅BANDAI，至出名嘅《機戰》搶錢系列，一樣有Fans邊鬧邊玩，BANDAI仲嫌唔夠喉，整多個《SD高達G-Gen》系列，將魔爪延伸到PSP上，再加多兩錢肉緊，以1,133隻MS（機動戰士）為號召，幾乎將歷代高達作品盡收其中，誓要你折服畀錢為止！
文：陳福榮
最新消息，由於貨源極少關係，有啲Game舖將合理價由300幾高炒上600幾，依然全港斷市，仲有唔少機迷周街撲貨，真吹脹！
原本仲以為家用版嘅《SD高達G-Gen》，先會大手筆咁將超大量內容塞落一隻碟度，事關之前PS2隻《G-GenSeed》實在劣評多於讚賞，始終鍾意玩高達Game嘅人唔少都有番咁上下年紀，偏向支持老餅嘢、想睇多啲歷史場面，而唔係齋玩認識唔多夠深入嘅《Seed》同《SeedDestiny》。
今次明顯睇出製作群嘅用心，皆因算係有史以嚟最大規模嘅製作，劇情模式唔單止包含咗由元祖《0079》到最新一輯《SeedDestiny》，電視同電影版全數一套不漏，此外仲有外傳如歷代MSV和幾本正統小說以至《戰慄之藍》等遊戲原創故事，連最新鮮滾熱辣嘅《SeedAstray》都有，而且版面總數70關共有1,133款機體、787位角色，真係學星爺話齋：晒你冷！
雙重Cut-in如睇片
PSP版比NDS、GBA甚至家用版出色，最明顯就係活用PSP個4.3"闊屏，令畫面內顯示部隊數增加，角色機體造型均一目了然，而迷你地圖則作進一步強化，可以概括睇到敵我雙方位置分布，大概係機能提升換來嘅一種便利。
更重要係各機體與角色嘅Cut-in場面變得更震撼，尤其係毋須就攻守交替嚟轉換畫面直接互抽，臨場感絕不下於家用機版本。假如每套片集指定角色作出對對碰，就有雙重Cut-in效果，似足睇緊卡通片。不過並唔係樣樣嘢咁抵讚，第一樣就係避免唔到PSP讀碟問題嘅影響，出入戰鬥動輒Load餐死，出招亦欠缺語音，雖未至《機戰MX》咁難以忍受，但已足夠減低遊戲流暢度， 惟有睇情況而關閉個戰鬥畫面啦。
任揀武器點玩都得
PSP版《SD高達G-Gen》另一特色，係選擇「攻擊」指令時，可以任揀採用咩武裝嚟對付敵機，地圖右方嗰個資訊顯示區會有相關資料圖文並茂咁出現，裏面有攻擊範圍和命中率等。唔使係咁轉換畫面煩到死，大大減低視覺干擾性。
唔少機迷都異口同聲稱，今集縱使有好多舊機，由於各個性能與砌機都作出改動，令老手都要花時間研究邊啲機比較啱用，當然仲有點樣打啲靚靚CG片出嚟睇啦！佢收錄咗總數60條片，包括G高達和X高達等有9條係全新製作，鍾意睇片嘅就真係啱到極。
特典DVD拆開賣
跟Game會限量送一隻PremiumDVD，裏面有過往幾集嘅宣傳片、開場CG同其他未收錄影片等，珍藏度一般，不過基於唔係「一跟一」，有啲舖頭就將DVD以$60散賣，值唔值真係見仁見智喇。
PROFILE
遊戲類型：SLG
對應機種：PSP
遊玩人數：1人
開發廠商：BANDAI
售價：約$320
