開畫日仆去睇《加勒比海盜：決戰魔盜王》（個中文譯名真係長，不過大家都只會話去睇魔盜王2），全院滿座，其中一位西人觀眾肯定係Fans，因為着晒成套海盜服裝嚟睇戲。
《魔盜王》第一集又唔係好好睇，又唔係唔好睇，當時想唔到會有續集，更想唔到續集嘅成績會好到咁離譜，在美國本土上畫，見紀錄就破，最架勢嘅就係成為最快突破一億票房的電影，目前昂然挑戰四億美元票房，即係接近三十億港元，你話係咪大生意？
既然第一集唔係話十分好睇，點解第二集會咁勁？諗極唔明，直到讀到一篇美國影評解說《魔》片續集的空前成功大部份來自選角出色，三位靚仔靚女偶像大明星，尊尼特普、姬拉麗莉、奧蘭度布林，身價雖今時唔同往日，但仍攜手合作演出娛樂性更豐富的續集，相信又是大製片家JerryBruckheimer的功勞。
《魔》片2帶領觀眾到一個更奇幻的世界，一班海產生物海盜，八爪魚首領、髻鯊助手，港式此起彼落的動作場面，唔理好唔好睇總之抵睇。最好先溫習一遍第一集才進場看續集，否則會有點迷失，跟唔上劇情。續集的結尾頗突然，更令香港觀眾期待周潤發將在第三集的出現，最好笑的是八爪魚的其中一個手下竟是廣東響螺人，在片中大講廣東話，「呢度呢度，哎呀」，笑死人。