𠵱家潮流興美女廚房，身為Model嘅Kimi&Cat都話要上嚟煮一番！「其實煮餸同襯衫一樣，多作嘗試左配右搭，隨時俾你撞出新口味！」今日介紹3道菜都係佢哋靠撞之作，最過癮係一味奇異香檳骨，佢話係由咕嚕肉演化出來！你唔講都真係估唔到！
記者︰劉昱蘭 攝影︰伍慶泉
示範︰中環讀者Kimi&Cat
鳴謝︰刀嘜橄欖芥花籽油
玩玩吓煮一餐
平時行Supermarket多過去Shopping嘅Kimi同Cat兩姊妹真係好鬼馬，一入廚房馬上搶鏡玩嘢！蘑菇車厘茄當耳環、豆角當健身彈弓，將原本擺入口嘅嘢全部都當玩具玩一餐，「其實煮嘢食好即興、好好玩，呢樣撈吓嗰樣攪吓又煮到一餐，同襯衫一樣咁好玩」。
香檳逼出果味
佢哋仲話呢世女最鍾意食就係咕嚕肉，不過唔明點解一定要用菠蘿煮，有次佢哋嘗試用同樣帶酸味嘅奇異果整，不過果還果、肉還肉，味道完全冇溝通；後來佢哋改用帶濕汁的香檳骨夾奇異果，「個香檳汁真係帶到奇異果嘅果味出嚟，𠵱家我哋鍾意食佢多過咕嚕肉㖭！」
另外一味好得意嘅夜香花煎蛋，係佢哋行街市時嘅新發現，街市阿姐教佢哋用夜香花冬瓜煲湯，好飲又啱時令。佢哋就口多多問人可唔可以用嚟煎蛋，阿姐一呆，話佢都未試過你哋自己試吓囉，點知出嚟效果又唔錯喎，「點解諗到煎蛋？冇解㗎喎，嗰一刻諗到乜咪整乜囉，衰咗都冇所謂㗎，乜都試吓先有新嘢玩。」
奇異香檳骨 果味香肉鮮甜
價錢︰$26/4人
需時︰15分鐘
材料：腩排12両、奇異果2個、亁葱茸1/2湯匙、橄欖芥花籽油3杯
芡汁：鹽/糖各1/4茶匙、粟粉1/2茶匙、水1/2杯
調味料：鹽1/2茶匙、生抽2湯匙、蜜糖1湯匙、香檳油1/2小支
1.醃料切件
排骨洗淨、抹亁、斬成2吋，加調味料醃半小時。奇異果去皮切成小件。
2.炸排骨
燒熱橄欖芥花籽油，放入排骨炸熟至金黃色，瀝亁油份，備用。
3.落鑊炒
爆香亁葱茸，放入奇異果略炒，加芡汁煮濃，將排骨回鑊即成。
貼士︰炸排骨油要夠熱，可用筷子放落去Check吓起唔起泡。排骨落鑊後爐火要收番細，皮先會脆。
玉藕夾餅 有咬口肉夠腍
價錢︰$22/3人
需時︰15分鐘
材料：蓮藕300克、免治豬肉150克、粟粉適量、橄欖油5湯匙
醃料：醬油/橄欖油/生粉各1茶匙、胡椒粉1/4茶匙
醬汁：蛋黃漿2湯匙、日本白味噌11/2湯匙
1.醃肉切藕
免治豬肉加入醃料拌勻備用；蓮藕切薄片，於一面拍上粟粉。
2.釀蓮藕
蓮藕片拍上粟粉的一面放上適量的免治豬肉，夾上另一蓮藕片。
3.煎蓮藕
燒熱油將藕餅煎6分鐘，反面再煎熟透；醬汁拌勻，伴肉碎蓮藕煎餅食用。
貼士︰蓮藕好易燶，記得用慢火去煎藕餅。
花香煎蛋餅 內軟外脆有口感
價錢︰$18/4人
需時︰20分鐘
材料：薯仔100克、洋葱20克、免治牛肉20克、鹽/胡椒適量、雞蛋4個、芝士粉50克、橄欖芥花籽油4湯匙
蔬菜配料：白菌片20克、夜香花20克、車厘茄30克、甘笋絲20克
1.薯仔壓茸
沸水煮薯仔至腍身，壓成茸；將蔬果配料以鹽和胡椒粉調味盛起。
2.爆鑊炒肉
燒熱2湯匙橄欖芥花籽油，加洋葱碎慢火炒香；轉大火，下免治牛肉炒熟。
3.煎蛋焗蛋
將所有材料與蛋汁拌勻，放落燒熱油鑊，慢火煎至底部凝固，放焗爐焗5分鐘至蛋面呈金黃色，即成。
貼士︰焗爐要用約7分鐘預熱至200℃。