資深股票客戶謝太：喂Karen，謝太啊。今個星期個市會點？
年輕貌美經紀Karen：謝太早晨，今個星期全世界都係睇美國聯儲局加唔加息。星期二晚、星期三凌晨就會知。去到上星期四，都仲有45%機會加息，不過到星期五紐約收市，就得番15%機會會加息。我諗都係唔加囉。
謝太：唔加息會點？
Karen：呢個係一個好好嘅問題。簡單啲諗，首當其衝嘅應該係美元。冇咗「加息」支持，美元應該會跌，因為美國通脹仲喺度惡化，所以「唔加息」會被視為聯儲局放棄保護美元購買力。跟住事態發展，就睇你係樂觀定係悲觀。樂觀嘅話，聯儲局決定唔加息，不過7、8、9月通脹又真係開始緩和，咁就算聯儲局畀唔到人「呼風喚雨」嘅感覺，都至少會好過我哋香港天文台畀人「能測天氣」嘅印象。因為踩brake煞車，力度啱啱好。
到適當時候，就可以開始減息，紓緩美國樓市下跌嘅壓力。美國樓市冇事，美國消費者可以繼續消費，繼續推動世界經濟增長。只要美國經濟增長速度，比美國政府支出增長速度快，咁世界就會繼續一片歌舞昇平。
謝太：咁悲觀呢？
Karen：悲觀睇法，聯儲局決定唔加息，不過7、8、9月通脹持續5、6月嘅升勢。聯儲局被迫重新開始加息，美國樓市繼續受壓，破壞美國消費者消費意欲。不過美國政府支出繼續快速增長，令到通貨膨脹、經濟收縮同時間出現。不過呢啲最早都會係出年嘅事。
謝太：講番今個星期，你覺得市場價格未反映「唔加息」咩？
Karen：今次加唔加息嘅爭議非常大。其實仲有好多人買咗會繼續加息，佢哋應該仲未投降。不過，如果市場價格未全面反映「唔再加息」呢個消息，即係話仲可以入市。咁如果美元跌，第一樣嘢升就應該係原材料。所以我建議謝太你今日買番啲原材料股票，例如8月23日公布業績嘅江西銅業（358）。
睇好原材料股揀江銅
謝太：又係呢隻？仲有得升咩？
Karen：用05年業績計，江銅市盈率12倍。不過，06年上半年業績，應該已倍數上升，市盈率又會細過8倍。只要金、銀、銅價唔跌，甚至因為聯儲局唔加息而升，佢嘅股價都會升。12月前，升過佢歷史高位$9.75。
不過，最後我都要同你講，今時今日，全世界都加息，就連大家都覺得經濟周期跑得最前、應該已經到減息期嘅英國，上個禮拜都出人意表咁加息（見圖）。所以，唔知聯儲局係唔係真係會「力排眾議」咁停止加息呢？